Японы эм зүйн салбарын тэргүүлэгч компани “Shionogi & Co” өөрийн бүтээсэн шинэ эмийг хүмүүс дээр туршиж эхэлсэн тухай “The Wall Street Journal” мэдээлэв. Энэ эмийг өдөрт 1 удаа уухад хангалттай. Курс эмчилгээ маш богино, шинэ эмийн ачаар 7 хоногийн дотор “COVID-19”-н шинж тэмдэг арилах юм байна. “Манай шинэ эмийг ууснаас хойш ердөө 5 хоногт ковидтой өвчтөний бие дэх вирүс саармагжиж устах юм. Туршилт амжилттай болбол манай компани шинэ эм хэрэгслээ түгээхийн тулд дэлхийн ямар ч байгууллагатай хамтран ажиллахад бэлэн байх болно” гэж “Shionogi & Co” компаний гүйцэтгэх захирал Исао Тешироги мэдэгджээ. Шинэ эм нь титэмт вирүсийн ферментийн идэвхжлийг бууруулах үйлчилгээтэй (чухам ферментийн нөлөөгөөр вирүс хүний биед өсч олширдог). 7 сард эхэлсэн туршилт 2022 он хүртэл үргэлжлэх төлөвтэй. Эхлээд Японы 100 иргэнийг туршилтад хамруулах ба дараа нь сайн дурын оролцогчдын тоог нэмнэ.  
Сонирхуулахад, “Shionogi” компаниас гадна АНУ-ын “Pfizer”, "Merck&Co" групп, Израилийн “Oramed Pharmaceuticals” компани мөн коронавирүсийн эсрэг эм бүтээж байгаа билээ.