Алдарт “Biophysical Journal” сэтгүүлд нэгэн сонирхолтой судалгааны дүнг нийтэлжээ. Коронавирүс бол хүний цусны эсүүдэд нөлөөлөх чадвартай болохыг Германы дархлааны төв ба Макс Планкийн нэрэмжит Анагаах, физикийн төвийн хэсэг эрдэмтэд илрүүллээ. Тэд 3 бүлэг хүмүүсийг судалжээ. Ковидын хурц хэлбэрээр өвчилсөн 17 өвчтөн, эдгэрч буй 14 хүн, мөн хяналтын бүлэг болгон цоо эрүүл 24 хүнийн судалгаанд хамруулсан аж. 3 бүлгийн хүмүүсийн 4 сая гаруй эсүүдийг сайтар судалсны эцэст эрдэмтэд “Коронавирүс нилээд их хугацааны дараа цусны улаан ба цагаан биетийн хэмжээ, төлөв байдалд нөлөөлөх чадвартай. Түүнчлэн зарим эсийн хэлбэрийг өөрчилж гажуудал үүсгэж байна” хэмээн дүгнэжээ.
Дээр дурдсан өөрчлөлтийн зарим нь өвчтөн эмнэлэгт хэвтээд гарснаас хойш 7 сарын дараа ажиглагдсан аж. “Коронавирүс ийнхүү урт хугацааны дараа ч нөлөөлж үйлчилсээр байх магадлалтай. “Covid 19”-өөр хөнгөн өвчлөх үед судсуудын окклюзи, уушигны эмболи... эсүүдэд хүчилтөрөгчийн хомсдол үүсэх зэргийг үүгээр тайлбарлаж болох юм” гэж судлаачид тайлбарлав.