Америк улсын Пенсильваний эрдэмтэн Сезар де ла Фуэнте коронавирүсийг оношлох цахилгаан-химийн тест бүтээсэн тухай “The Daily” мэдээллээ. “Одоо дэлхий даяар ашиглаж буй ковид илрүүлэх тест нилээд үнэтэй, иймээс хүртээмж багатай байдаг. Мөн тестийн хариу гарахад тодорхой цаг хугацаа шаардлагатай болдог. Чухам энэ асуудлыг би шийдэхийг хүссэн юм. Миний бүтээсэн ковидын тест хурдан бөгөөд хямд учраас бүх хүнд хүртээмжтэй байх болно гэж найдаж байгаа” хэмээн эрдэмтэн Сезар де ла Фуэнте ярилаа. 
Шинэ тест нь “LEAD” бага зардалтай цахилгаан-химийн дэлгэрэнгүй оношилгоо хийх чадвартай. Эрдэмтэн Фуэнте өөрийн төхөөрөмжийг графитан электродууд дээр суурилан хийсэн ажээ. Хэрэв шүлсээс дээж авбал тестийн магадлал 100%, харин хамраас авсан тохиолдолд 80% юм байна. Графитан электродтой шинэ тест 1,5 долларын үнэтэй, хариу нь ердөө 6,5 минутын дараа гардаг аж.