“COVID-19” бол амьсгалын замын өвчин биш гэдгийг Америкийн эрдэмтэд баталжээ. “Яагаад гэвэл, энэ өвчинд хамгийн түрүүнд хүний уушиг биш харин цусны судсууд өртөж байна. Ковидтой өвчтөнд амьсгалахтай холбоотой асуудал үүсэхийн өмнө эхлээд уушигны судсуудын эдүүд үрэвсч байгааг олж тогтоолоо. Инсульт, цусны эргэлт доголдох зэрэг элдэв хүндрэл яагаад ингэж олон гарч байдгийг чухам үүгээр тайлбарлах боломжтой” хэмээн эрдэмтэд мэдэгдлээ. Өөрөөр хэлбэл, ковид нь хамгийн түрүүнд артери буюу цусны системийг гэмтээдэг учраас түүнийг уушигны биш судасны өвчин гэж үзсэн аж. Эрдэмтдийн судалгаа шинжилгээний ажил нь “Journal Circulation Research” шинжлэх ухааны сэтгүүлд нийтлэгджээ. Сан-Диго дахь Калифорний их сургуулийн эрдэмтэд зөвхөн S-уураг SARS-CoV-2-с бүрдсэн хуурамч вирүс бүтээж судлахад түүгээр “COVID-19”-г үүсгэж болж байв. Энэхүү S-уураг нь АСЕ-2 рецепторт нөлөөлж эсүүдийн митохондрийг гэмтээх ба улмаар цусны судсууд ч гэмтдэг нь судалгааны явцад тогтоогджээ. "Хүнд хэлбэрээр өвчлөх үед артерид тромб үүсдэг, чухам ингэж цус бүлэгнэснээс болж хүмүүс голдуу нас бардаг юм байна, иймээс “COVID-19”-г ханиад томуутай адилтган авч үзэж болохгүй. Эмчилгээ ч өөр байх ёстой" гэж АНУ-ын эрдэмтэд дүгнэжээ.