Оросын Мэргэжлийн хяналтын харьяа Цар тахлын эрдэм шинжилгээний төвийн эрдэмтэд ямар ч биологийн шингэнээс “SARS-CoV-2”-н РНК-г илрүүлдэг тест бүтээсэн тухай "yandex.ru" мэдээлэв. Цаашид хамраас гадна цэр, цусны плазм, бронхоальвеолярный лаваж, ялгадас, шулуун гэдсээс авсан дээж, задлангийн материалаас ч коронавирүсийг илрүүлнэ. Тэр бүү хэл хүрээлэн буй орчин тухайлбал ус, объектын гадаргуугаас урссан уснаас вирүс илрүүлэх аж. “Энэ бол дэлхийн анхны полимераз гинжин хариу урвал дээр суурилсан тест систем. Түүнийг юуны өмнө халдварын голомт дээр шинж тэмдэггүй эсвэл сул шинж тэмдэг илэрсэн үед вирүсийг илрүүлэхэд ашиглана” гэж тус төвийн эрдэм шинжилгээ хариуцсан дэд захирал Александр Горелов мэдэгдлээ. Мөн эхний тестийн хариу сэжигтэй гарсан үед ашиглах боломжтой. Тест 6 цагийн дотор маш нарийвчлалтай хариу өгч, ковидоор өвдсөн эсэхийг тогтооно, түүнчлэн өвчин ямар үе шатанд явааг тодорхойлдог. Сонирхуулахад, “SARS-CoV-2” нь хүний бие организмаас тодорхой мөчлөгтэй ялгардаг тул хамраас дээж авахад заримдаа илэрдэггүй, иймээс өвчин үүсгэгчийг нэг бол цусаар эсвэл цэр, өтгөнөөр илрүүлдэг юм байна.