“Ковид ба чихрийн шижин өвчний хооронд холбоо байна. Сүүлийн үеийн хэд хэдэн судалгаанаас үзэхэд “COVID 19”-н вирүс нь инсулин ялгаруулагч нойр булчирхайн эсүүдийг гэмтээдэг байж болзошгүй” хэмээн эрдэмтэд мэдэгдсэнийг “The Guardian” сонин нийтэлжээ. “Коронавирүсийн халдвар авсны дараа, эсвэл ковид өвчнөө эмчлүүлж эдгэрсний дараа чихрийн шижин туссан хүмүүсийн тоо өсч байгаад эмч нар түгшиж байна. Эрдэмтэд үүний учрыг олох гэж олон онол дэвшүүлж судалж эхэллээ... . Инсулин бол цусан дахь глюкозын түвшнийг зохицуулдаг даавар... Вирүс нэг бол нойр булчирхайн эсүүдэд халдварлаж инсулин ялгаруулах чадварт нөлөөлдөг, эсвэл эсрэг биетүүд хэт олноор үүсэхээр нойр булчирхайн эсүүдийг санамсаргүй гэмтээж болзошгүй. Үгүй бол биеийн өөр газарт үрэвсэл үүссэнээр эдүүд нь инсулинд бага мэдрэмтгий болдог байх” зэрэг таамаглалыг эрдэмтэд дэвшүүлжээ. Нью-Йорк хотын “Weill Cornell Medicine”-н профессор Шуибинг Чен шинжилгээ хийхийн тулд янз бүрийн эсүүд, органиодыг (лабораторид ургуулсан эсүүдийн кластерүүд) шалгаж үзсэн аж. Гэтэл уушиг, бүдүүн гэдэс, зүрх, элэг, нойр булчирхайн органиодууд нь халдвар авч болзошгүй болохыг шинжилгээний үр дүн баталжээ. Түүнчлэн дофамин ялгаруулдаг тархины эсүүд ч ялгаагүй. Цаашдын туршилтуудаас үзэхэд халдвар авсны дараа нойр булчирхайн эсүүд бага инсулин ялгаруулж байв, үүний зэрэгцээ энэ булчирхайн янз бүрийн эсүүдийн ялгаруулдаг бусад даавар ч багасчээ. “Бид үүнийг трансдифференцировка гэж нэрлэсэн. Эдгээр нь голдуу эсүүдийн хувь заяаг өөрчилдөг, иймээс их инсулин ялгаруулах хардкзор бета эсүүд хувирч... янз бүрийн даавруудыг хольж эхэлдэг. Энэ нь ковидын эмгэг механизмыг илүү гүн ойлгоход тустай” гэж профессор Чен өөрийн судалгааны дүнг Чихрийн шижин судлах Европын нийгэмлэгийн жил тутмын хуралдаанд танилцуулахдаа мэдэгдэв. Ковидын улмаас гарсан ийм өөрчлөлт хэр удаан үргэлжлэхийг эрдэмтэд тогтоож чадаагүй, гэхдээ эрчимт эмчилгээний тасгийн өвчтөнүүдийг ажиглахад зарим нь удахгүй эдгэрч байв. Италийн Сиений их сургуулийн профессор Франческо Дотт хамтран зүтгэгчидтэйгээ нийлж мөн энэ сэдвээр тусдаа судалгаа явуулан коронавирүс ба чихрийн шижин өвчний холбоог баталжээ.