Ковидоор хөнгөн өвдсөн тохиолдолд ч олон, таагүй уршиг дагавартай тухай Америкийн Вашингтоны анагаахын сургуулийн эмч нар, мөн Сент-Луисын ахмадын эрүүл мэндийг хамгаалах албаны эрдэмтэд мэдэгдлээ. Тэдний судалгааны бүтээлийг удахгүй “Nature Portfolio” сэтгүүл нийтлэхээр зэхэж байна. “COVID 19-ийн уршиг дагавар маш их, энэ өвчнөөр хөнгөн өвдөж эдгэрсний дараа бүтэн жилийн турш зүрхний дутагдал, инсульт, инфаркт, зүрх ба уушигны судас бөглөрөх эрсдэлтэй. Хэрэв ковидоор хүнд өвчилж эмнэлэгт хэвтээд гарсан бол энэ эрсдэл хэд дахин нэмэгддэг. Иймээс Засгийн газар, эрүүл мэндийн систем эдгэрээд гарсан хүмүүст тавих анхаарлаа сулруулж болохгүй. Бид үүнийг нухацтай хүлээж авахгүй байгаад миний сэтгэл түгшиж байна” хэмээн судалгааны багийн удирдагч, доктор Зияд Аль-Али сэрэмжлүүлэв. Энэ бүхний шалтгааныг эрдэмтэд үргэлжлүүлэн судалсаар байна, тэдний үзсэнээр ковидоос болж мэдрэлийн болон зүрх судасны гээд олон систем, эрхтэн гэмтдэг аж.
Эрдэмтэд ковидоор өвчилсөн 3,7 сая хүнийг судалсан, тэдний 150 мянга нь энэ өвчнөөр давтан өвчилжээ. Ковидоор хөнгөн өвчлөөд эмнэлэгт хэвтээгүй хүмүүсийг бүтэн жил ажиглахад зүрхний дутагдал үүсэх эрсдэл 39%, инсульт тусах 24%, уушигны судас бөглөрөх 119%, зүрхний булчин үрэвсэх, бөглөрөх магадлал 277% нэмэгдсэн байв. Эмнэлэгт хэвтээд гарсан хүмүүсийн хувьд байдал бүр хэцүү, тухайлбал зүрхний дутагдал үүсэх эрсдэл 482%, хэрэв эрчим эмчилгээний тасагт эмчлүүлсэн бол бүр 2774% байлаа. Инсультийн эрсдэл 2 дахин өссөн, эрчимт эмчилгээ хийлгэсэн тохиолдолд бүр 4 дахин ихэсчээ. Эмнэлэгт хэвтсэн бол тромбоэмболийн эрсдэл 855%, эрчимт эмчилгээ хийлгэсэн хүмүүст 2426%, миокардитын эрсдэл тус тус 1264% ба 3940%. Товчхондоо ковидын хор уршгийг тоочоод баршгүй болохыг дэлхийн эрдэмтдийн хамгийн сүүлийн үеийн судалгаа шинжилгээ нотоллоо. Иймээс  та бүхэн коронавирүсийн халдвараас сэргийлэхийн тулд бүгд маскаа зүүж гарын ариун цэврийг сайтар сахин вакцинжуулалтад заавал хамрагдаарай!
Эх сурвалж: gazeta.ru