Орос улсын Гамалеин нэрэмжит Тахал, микробиологийн эрдэм шинжилгээний төв нь нийслэл Москвагийн Эрүүл мэндийн яамтай хамтарч эсрэг биетийн судалгаа явуулжээ. 4000 гаруй хүнийг судалгаанд хамруулсан гэж “Известия” сонин мэдээллээ. Дашрамд дурдахад, эсрэг биет гэдэг нь хүний бие организмд ямарваа нэгэн халдвар (тухайлбал, коронавирүс) нэвтэрсний хариуд дархлааны системийн ялгаруулдаг тусгай уургууд юм. Эсрэг биетүүд нь халдварын вирүсийг таньж халдваргүй болгохоор барахгүй энэ талаарх мэдээллийг хадгалж байдаг. 
Гамалеи төвийн захирал Александр Гинцбург "Москва хотын 4000 оршин суугчийг хамруулж судлахад хэрэв бие организм дахь эсрэг биетийн тоо 300 бол дельта штаммаас бүрэн хамгаалж чадаж байна. Харин 500 ба түүнээс дээш бол өвчлөх эрсдэл огцом буурдаг” хэмээн мэдэгджээ. Нэмж өгүүлэхэд, ковидын дараа тогтсон эсрэг биетүүд нь халдвар авснаас хойш дор хаяж 10 сар хүнийг хамгаалдаг гэсэн дүгнэлтийг Лондоны хааны коллежийн эрдэмтэд хийжээ. Тэд коронавирүсийн 1-р давалгааны үеэр ковидоор өвчилсөн хүмүүсийн цусны дээжийг шинжлээд ийм дүгнэлтэд хүрсэн аж. Нэмж өгүүлэхэд, Орос бол зөвхөн өөрийн үйлдвэрлэсэн 5 вакциныг ард иргэддээ тарьж байгаа. Үүнд: “Спутник V”, “ЭпиВакКорона”, “ЭпиВакКорона-Н”, “КовиВак”, “Спутник Лайт”.