Хүн төрөлхтөнд учирч болзошгүй хамгийн том аюулын тухай Америкийн тэрбумтан, “Tesla” ба “SpaceX” компанийг үндэслэгч Илон Маск сэрэмжлүүлснийг “CNBC” дамжууллаа. “Төрөлт багасч байгааг дэлхийн статистик мэдээ харууллаа. Хүн амын өсөлт хяналтгүй явагддаг гэж зарим нь үздэг, энэ бол эндүүрэл. Хэрэв хүмүүс цаашид ч хүүхэд төрүүлэхээс татгалзсаар байвал соёл иргэншил, хүн төрөлхтөн мөхөж сөнөнө. Хүмүүс хүрэлцэхгүй байна” гэж Илон Маск мэдэгджээ. Харин хүн ам зүй судлаачид “Дэлхийн улс орнуудад хүмүүс бөөн бөөнөөрөө үр хүүхэдтэй болохоос татгалзах болжээ. Тэд ирээдүйгээс айдаг, бас дэлхийн хүн ам олширсон гэж үздэг, мөн цаг уурын өөрчлөлт, дулаарал, өлсгөлөнгөөс айдаг” гэж тайлбарлаж байна. Сонирхуулахад, хүн ам зүйчид өнөөгийн Цар тахал дэлхийн хүн амын өсөлтөд ямархуу гарз хохирол учруулсныг тооцоолон гаргажээ. Тэдний явуулсан судалгааны дүнг “The BMJ” эрдэм шинжилгээний сэтгүүл нийтэлсэн байна. “Цар тахлын улмаас 2020 онд дэлхийн хөгжингүй 37 орон нийт 28 сая иргэнтэй болох боломжоо алдлаа.... Болгар, Латви, Польш, Америк, Оросын хүн амын өсөлтөд энэ коронавирүс хамгийн их хохирол учрууллаа” гэж судлаачид мэдэгдлээ.