Харвардын анагаахын сургууль ба Бостоны Хүүхдийн эмнэлгийн эмч, эрдэмтэд судалгаа явуулсны эцэст архины хамааралтай хүмүүсийг эмчилдэг “дисульфирам” эмийг “COVID-19”-н эсрэг ашиглаж болно гэж мэдэгдлээ. “Дисульфирам” эмийг ковидоор өвчилсөн үед хэрэглэж болно, нас барах эрсдэлийг бууруулда гэж эрдэмтэд дүгнэжээ. Тэд судалгааны дүнгээ “PLOS One” хэмээх олон улсын эрдэм шинжилгээний сэтгүүлд нийтлүүллээ. Үндэсний эрүүл мэндийн системийн ахмадын асуудал хариуцсан сангийн мэдээллийг судлаачид ашигласан ба олон ахмадын өвчний түүхийг судалж тооцоолол, дүн шинжилгээ хийсэн аж. 944 мянган хүнийг авч үзэхэд 2020 оны 2 сараас 2021 оны 2 сар хүртэл тэд бүгд дор хаяж 1 удаа “SARS-CoV-2” буюу ковидын тест өгчээ. Ахмад настнуудын 2233 нь “дисульфирам” эм ууж байв. “Дисульфирам” эм хэрэглэдэг ахмад настнууд ковидоор өвчлөх нь уг эмийг уудаггүй хүмүүсийнхээс 34% бага байсан, түүнчлэн ийм эм уусан хүмүүсээс ковидоор нас барсан тохиолдол гараагүй аж.
“Гэхдээ манай судалгаанд дутагдалтай тал бий. Ахмад настнууд энэ үеэр эмнэлгийн өөр тусламж авсан байж болзошгүй, тэдний онош ба эмчилгээг бүрэн дүүрэн бичээгүй байсан. Мөн өвчтөнүүд үнэхээр дисульфирам эм тасралтгүй ууж байсан эсэх, коронавирүсийн халдвар авсны дараа энэ эмийг үргэлжлүүлэн уусан эсэхийг бид мэдэхгүй. Мөн өөр хүчин зүйлс ковидын эдгэрэлтэд нөлөөлсөн байхыг үгүйсгэхгүй” гэж эрдэмтэд тайлбарлажээ. 
Сонирхуулахад, “дисульфирам” эмийг алкоголизмын эсрэг 60 гаруй жил ашиглаж байгаа аж. Оросын эрдэмтэд мөн энэ тухай судалж “Mendeleev Communications” сэтгүүлийн 2020 оны 7-р сарын дугаарт нийтлэлээ хэвлүүлжээ.