Ковидын паспорттой чипийг Швед улсын “Epicenter” компани үйлдвэрлэж хүмүүсийн арьсан доор суулгаж эхэлжээ. Тоон технологийн салбарын шинжээч Моа Петерсон “Шведийн 6000 орчим иргэн гарынхаа арьсан доор ийм чип суулгасан” гэж ярилаа. “NFC хэмээх арьсан доорх имплант бол өгөгдлийг гаджетийн тусламжтай уншина гэж зохион бүтээгчид ярилаа. Арьсан доор чип суулгахад аюулгүй, өвдөхгүй. Чипийг гарын тохой ба сарвуугийн хооронд эсвэл эрхий ба долоовор хурууны  завсарт суулгаж болно. Түүнчлэн чипийг буцааж авахад маш амархан, дуртай үедээ ийм ажиллагаа хийлгэх боломжтой” гэж “Ruptly” мэдээллээ. Эдгээр чипэнд ковидын паспортоос гадна албан бичиг баримтууд, нийтийн тээврийн карт, спорт танхимаар үйлчлүүлэх үнэмлэх зэргээ ч хадгалж болох аж. “Энэ бол маш өвөрмөц, эвтэйхэн технологи, хүссэн үедээ ковидын үнэмлэхээ гаргаж ирнэ. Мөн янз бүрийн зорилгоор ашиглах боломжтой” гэж зохион бүтээсэн компаний мэргэжилтэн Ханнес Сжоблад тайлбарлалаа. Харин Английн имплантологийн тэргүүлэгч компаний захирал Стивен Нортэм “10-15 жилийн дараа микро чиптой хүмүүс энгийн үзэгдэл болно” гэж мэдэгдэв.
Гэхдээ үүнийг Шведийн зарим иргэн эсэргүүцэж “Энэ бол төр засаг ба тодорхой байгууллагууд өөрийн ард иргэдээ цагдаж мөрдөх, хувийн амьдралд нь нэвтрэх, амьдралын хэв маягийг хянах зориулалттай технологи” гэж шүүмжилжээ.