Коронавирүсээс үр дүнтэй хамгаалах шинэ аргыг Канад улсын Уотерлу их сургуулийн эрдэмтэд илрүүллээ. Тэд судалгаа, туршилт явуулсны эцэст цэвэр зэс эсвэл зэстэй нэгдлүүд нь “SARS-CoV-2” коронавирүсийг идэвхгүй болгох буюу устгадаг болохыг тогтоожээ. Энэ тухай “APL Materials” сэтгүүлийн нийтлэлд дурдсан байна. Судлаачид зэс болон зэсийн оксидоор 6 янзын маш нимгэн, нано бүрхүүл бэлдэж “HCov-229E” хэмээх коронавирүсийн нэг төрөлтэй хэрхэн харилцан үйлчлэлцэж байгааг судлав. Энэхүү төрөл нь генетикийн хувьд “SARS-CoV-2”-той төстэй юм байна. Тестийн үед шил ба даавуун дээр зэсэн бүрхүүл түрхжээ, энэ зэстэй түрхэцийн зузаан нь хүний үсээс 1000 дахин нимгэн аж. Ингээд уг загварыг вирүстэй уусмалд хийх буюу зэсэн бүрхүүл дээр энэ вирүстэй уусмалаас хэдэн дуслыг дусаах зэргээр туршжээ. Эрдэмтэд дараа нь вирүс тархах хурдыг хэмжихийн тулд зэсэн бүрхүүлтэй харьцсан уусмалыг эрүүл эсүүдтэй орчинд байрлуулан шалгалаа. Ингэхэд зэс ба зэс агуулсан нэгдлүүд нь вирүсийн эсрэг үйлчилгээтэй болох нь нотлогджээ. “Вирүс агуулсан шингэн дотор нанохэмжээтэй хальс уусгасан тохиолдолд нөлөөлөл улам хүчтэй болж байсан. Даавуун материалд хэрэв зэсэн түрхэц түрхэн эмнэлгийн зориулалттай маск үйлдвэрлэвэл коронавирүсээс илүү сайн хамгаалах болно” гэж судлаачид мэдэгдлээ.