“COVID-19”-н эсрэг үйлчилгээтэй шинэ вакцин хөгжүүлсэн тухай Америк, Австралийн эрдэмтэд мэдэгдсэнийг “medRxiv.org” дамжууллаа. Эрдэмтэд энэ үеэр IgY иммуноглобулиныг тахианы өндөгнөөс гаргаж авсан юм байна. “Коронавирүс хүмүүсийн бие организмд хамрын салслаг бүрхүүлээр дамжин нэвтэрдэг, иймээс эсрэг биетүүдийг хамраар дамжуулан дотогш оруулах ёстой. Энэ нь халдвараас сэргийлэхэд шийдвэрлэх үүрэг гүйцэтгэнэ” гэж эрдэмтэд үзжээ. Тэд эсрэг биетүүдийг хурдан гаргаж авах арга олсон байна. Тухайлбал өндөглөгч тахианд рецептор (домен RBD ба SARS-CoV-2-н спайк уураг) тарихад 14 хоногийн дараа тахианы өндгөн дэх вирүсийн эсрэг үйлчилгээтэй IgY эсрэг биетүүдийн түвшин хангалттай хэмжээнд хүрч байв. I шатны клиник судалгаа хийхэд энэ эсрэг биетүүд аюулгүй бөгөөд эрүүл хүмүүс үүнийг тун дажгүй даван туулж байгаа нь тогтоогджээ. “Тахианы өндөгний иммуноглобулин дээр суурилсан манай вакцин бол коронавирүсийн бүх төрлийн эсрэг үйлчилнэ. Гэхдээ өндөгний шарны харшилтай хүмүүс хэрэглэж болохгүй” гэж АНУ, Австралийн эрдэмтэд мэдэгдлээ.