Коронавирүс сэтгэцэд сөргөөр нөлөөлдөг тухай нийтлэл “MedicalXpress”, “BMJ” сэтгүүлд нийтлэгджээ. Сент-Луис дахь Вашингтоны их сургуулийн Анагаахын сургуулийн эрдэмтэд судалгаа хийсний эцэст “Ковидоор өвдсөн хүмүүсийн хувьд сэтгэцийн хямралд өртөх эрсдэл улам ихэсдэг” хэмээн мэдэгдэв. Эрдэмтэд нийт 153848 хүнийг судалж, үзүүлэлтүүдийг ковидоор өвчлөөгүй хүмүүстэй харьцуулжээ. Мөн сэтгэцэд зөвхөн коронавирүс сөрөг нөлөөлдөг эсэхийг тодруулахаар грипптэй хүмүүстэй ч бас харьцуулж үзсэн аж. Ковид хөнгөн ба хүнд туссанаас үл хамааран судалгаанд хамрагдсан хүмүүст бүтэн жилийн турш түгших, сэтгэлээр унах, гутрах, амиа хорлох бодол төрөх, нойрны дэглэм алдагдах, танин мэдэхүйн чадвар алдагдах доголдох, архи ба хар тамхи хэрэглэснээс үүдэлтэй хямрал, опиоид хэрэглэхтэй холбоотой хямрал зэрэг илэрч байжээ. Ер нь ковидоор өвчлөгсдийг огт өвдөөгүй хүмүүстэй харьцуулахад сэтгэцийн хямралд өртөх нь 60%-иар их байжээ. Тодруулбал, ковидоор өвчлөөд эдгэрсэн хүмүүс бусадтай харьцуулахад түгших нь 35%-иар, сэтгэл гутралд орох 40%-иар, нойргүйдэх 41%-иар их байсан. Мөн тэдэнд мартамхай болох, анхаарал төвлөрөхгүй байх, ухаан самуурах зэрэг үзэгдэл илрэх нь 80% илүү гэж эрдэмтэд онцлон тэмдэглэв. Чухам яагаад гэдэг шалтгааныг эрдэмтэд олж чадаагүй, гэхдээ тэдний таамаглаж буйгаар коронавирүс хүмүүсийн уураг тархинд нэвтэрч эсүүд ба нейронуудын холбоог устгаж сэтгэцийн хямрал өдөөдөг бололтой.