АНУ-д хийсэн судалгаагаар АstraZeneca вакцины үр дүн 79 хувьтай байна. Харин настай хүмүүст энэ вакцины үр дүн 80 хувь байна гэж клиникийн туршилтын гурав дахь үе шатны дараа мэдээлжээ. 65-аас дээш насныханд AstraZeneca вакцины үр дүн 80 хувь байсан аж. Судалгаанд АНУ-д энэхүү вакциныг хийлгэсэн 32449 хүн оролцжээ. Судалгааны үеэр АstraZeneca вакцины хоёр дахь тунг эхний тунгаас нь дөрвөн долоо хоногийн дараа хийсэн байна. “AstraZeneca” компани мөн уг вакцин нь коронавирусний халдвар хүндрэх болон эмнэлэгт хэвтэх эрсдэлээс 100 хувь хамгаална гэж мэдэгдсэн. Судалгаагаагаар АstraZeneca вакцины аюулгүй байдалтай холбоотой ямар ч асуудал илрүүлээгүй байна. Энэ вакциныг цусны бүлэгнэл үүсгэж байна гэсэн мэдээллийн дагуу шалгахад цус өтгөрүүлэх, бүлэгнүүлэх ямар ч эрсдэл олоогүй аж. Цусны бүлэгнэл үүсгэж байгаа эсэх судалгааг АstraZeneca вакцины эхний тунг тариулсан 21583 хүнд хийсэн байна. Европын эмийн агентлагаас (ЕМА) мэдээлснээр АstraZeneca вакцин нь маш ховор төрлийн цусны бүлэгнэлтийн эмгэг үүсэхэд нөлөөлж болох ч үүнээс урьдчилан сэргийлж болох аж. АstraZeneca вакцин нь бүх насныхан, бүх үндэстэн ястанд үр дүнтэй гэж АНУ-д явуулсан судалгаагаар тогтоожээ. Судалгаанд оролцсон хүмүүс дунд цагаан болон өнгөт арьстнууд, уугуул америкчууд, ази, латин америк хүмүүс байсан бөгөөд судалгаанд оролцогчдын 20 хувь нь 65 настай хүмүүс, 60 хувь нь коронавирусний халдвараар өвчилвөл хүндрэх аюултай чихрийн шижин, таргалалт, зүрхний өвчин зэрэг ямар нэгэн суурь өвчинтэй хүмүүс байжээ.Их Британи, ӨАБНУ, Бразилд өмнө нь хийсэн судалгаагаар АstraZeneca вакцины үр дүнг 82 хувь гэсэн билээ. Энэхүү вакцины үр дүнгийн судалгаа дуусаагүй байгааг Оксфордын их сургуулиас мэдээлжээ. AstraZeneca вакцин нь шимпанзед ханиад томуу үүсгэдэг сулруулсан вирусний үндсэн дээр суурилан хийсэн, коронавирусний генетикийн материалыг агуулсан тарилга юм. Вакциныг хийлгэсний дараа хүний дархлааны системд коронавирус бие организмд орж ирвэл танихад туслах тусгай уураг бий болно. Европын эмийн агентлагийн (EMA) Гүйцэтгэх захирал Эмер Күүк “Шинжлэх ухааны тодорхой дүгнэлт хийхэд AstraZeneca вакцин аюулгүй бөгөөд үр дүнтэй, коронавирусний эсрэг хэрэглэх ёстой вакцин юм. Энэ вакцин цус өтгөрөлт үүсгэдэг болохыг олж тогтоогоогүй. Ховор тохиолдох цусны бүлэгнэлтийн эмгэг үүсэхэд нөлөөлж болохыг үгүйсгэхгүй ч хэдэн сая вакцин хэрэглэснээс долоод нь л ийм тохиолдол гарна” гэжээ. AstraZeneca вакцины үр дүн нь үүсгэж болох эрсдэлээсээ давсан гэж Европын эмийн агентлаг онцолсон. Энэ вакциныг 11 сая гаруй хүндээ тарьсан Их Британи улсад л гэхэд AstraZeneca вакцин коронавирусний халдварын тархалтыг бууруулж, эмнэлэгт хэвтэн эмчлүүлэх өвчтөний тоог багасгажээ. AstraZeneca вакциныг Цельсийн 2-8 хэмд хадгалах боломжтой бөгөөд бусад вакцинтай харьцуулахад түгээхэд хялбар аж.

Pfizer- болон BioNTech компанийн хамтран гаргасан "BNT162b2" вакцинд ДЭМБ хамгийн түрүүнд хэрэглэх зөвшөөрөл олгосон. Энэхүү вакцин нь 16 ба түүнээс дээш насны хүмүүст зориулагдсан. Вакцинжуулалтад хамрагдсан хүмүүсийг хамрагдаагүй хүмүүстэй харьцуулахад маш бага тоогоор коронавирусний халдвараар өвчилж байгааг баталжээ. "BNT162b2" вакцин нь ковидын халдвараас урьдчилан сэргийлэх 95 хувийн үр дүнтэй байгаа аж. Мөн 16-аас доош насныханд үзүүлэх сөрөг нөлөөгүй нь судалгаагаар батлагджээ.

Pfizer/BioNTech вакцины хүүхдүүдэд зориулсан хувилбар нь 100 хувийн үр дүн үзүүлснийг 12-15 насны 2260 хүүхдэд тарьсан туршилтаар баталсан байна. АНУ-д одоогоор 16-аас дээш насныханд хийж байгаа тус вакцинд зургаан сартайгаас 11 настай хүүхдүүдийг хамруулсан эмнэлзүйн туршилтыг эхлүүлжээ. Вакцины эхний тунг тарьснаас хойш гурван долоо хоногийн дараа хоёр дахь тунг тарих ёстой. Pfizer/BioNTech вакцины хоёр дахь тунг хийснээс хойш ойролцоогоор долоо хоногийн дараа хангалттай дархлаа тогтож байгаа аж. АстраЗенека вакцинаас 5-6 дахин үнэтэй байгаа тус вакцин нь уламжлалт бус аргаар, хамгийн сүүлийн үеийн технологиор гаргаж авсан вакцин юм. Дархлааны тогтолцоог коронавирусний эсрэг идэвхжүүлж, дархлааны систем ямар биетүүдийг бий болгох талаар тодорхой мэдээллийг хүлээж авснаар хариу урвал идэвхжих аж. Мөн вакцин хийлгэсний дараа дахин халдвар авах эрсдэл байхгүй, аюулгүй гэж мэргэжилтнүүд хүлээн зөвшөөрчээ. Pfizer/BioNTech вакцин хадгалах нөхцөлийн хувьд бусад вакцинаас илүү өндөр стандарт шаардана. Цельсийн -70 хэмд хадгалах ёстой.

БНХАУ-ын “Синофарм” үйлдвэрийн Vero cell вакцин дотооддоо хийсэн судалгаагаар 79 хувийн үр дүн үзүүлсэн бол Арабын Нэгдсэн Эмирт улсад хийсэн туршилтаар 86 хувийн үр дүн үзүүлжээ. Хятад улс Vero cell вакциныг 2020 оны долоодугаар сард хүн амынхаа эрсдэл өндөртэй бүлгүүдэд яаралтай горимоор тарихаар баталсан. Энэхүү вакцин хадгалах горимын хувьд тун энгийн. Ердийн хөргөгчинд 4-8 хэмд хадгалж болох Vero cell вакцины хоёр дахь тунг эхнийхээс нь 21 хоногийн зайтай хийнэ. Хэрвээ хоёр дахь тунгаа хийлгэх хугацаа өнгөрсөн бол аль болох хурдан дараагийн тунг нь тариулах ёстой юм. Vero cell вакциныг халдварт саа, улаан бурхан зэрэг өвчний вакциныг гаргаж авсан уламжлалт аргад үндэслэн гаргаж авсан бөгөөд сулруулсан вирусийг агуулсан энэ вакцинд сөрөг нөлөө байхгүй гэж эрдэмтэд хүлээн зөвшөөрчээ. Энэхүү вакциныг 1 сая хүнд тарьсны дараа хийсэн судалгаагаар вакцины дараах ямар нэгэн хүндрэл, гаж нөлөө илрээгүй байна.

ОХУ өнгөрсөн зун дэлхийд анх удаагаа ковидын эсрэг үйлчлэх вакцин гаргаж авсан нь Спутник V. 

Москва дахь Н.Ф.Гамалеягийн нэрэмжит Халдвар судлал, бичил биологийн эрдэм шинжилгээний төвийн эрдэмтдийн гарган авсан Спутник-V вакцин нь 90-ээс дээш хувийн үр дүн үзүүлжээ. Энэхүү вакцины ковидоос хамгаалах үр дүнг одоогоор 91.6 гэж эмнэлзүйн туршилтын гуравдугаар үе шатны мэдээлэл дээр үндэслэн тодорхойлжээ. Спутник V вакцин нь хүнээс гаргаж авсан аденовирус 6, аденовирус 26-г ашиглаж хийсэн, олон арван жилийн туршид судлагдсан аргаар гаргаж авсан, аюулгүй вакцин аж. Вакцин нь эс рүү нэвтрээд уураг үйлдвэрлэж, үйлдвэрлэсэн уураг нь эсийн гадаргуу дээр гараад ирэнгүүт дархлааны эсүүд түүнийг харь биет байна гэж таниад санамж эсүүд үүсгэнэ. Санамж эсүүд нь дархлааны эсүүдэд ковидыг таних эсрэг биетүүдийг үйлдвэрлэхэд тусална.

Спутник-V-г бусад 90-ээс дээш хувийн үр дүн үзүүлсэн Файзер, Модерна вакцинуудаас хэд хэдэн давуу талтай гэж Н.Ф.Гамалеягийн нэрэмжит Халдвар судлал, бичил биологийн эрдэм шинжилгээний төвөөс мэдээлжээ. Олон улсын шинжээчдийн дүгнэлтээр энэхүү вакцин нь ковидын халдвар хүндрэхээс 100 хувь хамгаалах бөгөөд вакцин тариулсан хүний ялгаруулах эсрэг биетийн түвшин нь ковидоор өвчилсөн хүнийхээс 1.3-1.5 дахин өндөр байжээ. Мөн Спутник-V-г тариулсны дараа толгой өвдөх, дотор муухайрах, сульдах зэрэг шинж тэмдгүүдийн 94 хувь нь хөнгөн хэлбэрээр илэрч байгаа аж. Спутник-V вакцины дараах харшлын хариу урвал, анафилаксийн шок зэрэг цочмог хэлбэрийн хариу урвал огт бүртгэгдээгүй. Үнийн хувьд хямд тусах энэхүү вакциныг ердийн хөргөгчинд 2-8 хэмд хадгалах боломжтой. Оросын Засгийн газрын шадар сайд, Коронавирусний эсрэг тэмцэх шуурхай штабын дарга Татьяна Голиковагийн мэдэгдсэнээр Спутник-V вакциныг тариулсан бол 14 хоногийн турш архи, согтууруулах ундаа болон дархлааг дарангуйлдаг эм хэрэглэж болохгүй. Спутник-V вакциныг дэлхийн 35 оронд албан ёсоор бүртгэжээ. ОХУ-аас энэхүү вакциныг авах захиалгаа дэлхийн 52 орон ирүүлсэн байна. Монгол Улсын тухайд, 1 сая тун Спутник V вакцин оруулж ирэхээр Засгийн газрын түвшинд яриа хэлэлцээ хийж байгаа талаар ЭМЯ-ны Эрүүл мэндийн нийтийн бодлогын хэрэгжилтийг зохицуулах газрын дарга Л.Энхсайхан мэдэгдсэн юм. Мөн ОХУ манай улсад 300 мянган тун Спутник V вакциныг бэлэглэнэ гэсэн яриа байгаа аж. Вакциныг орж ирэхээр нь иргэддээ мэдээлэл өгнө гэсэн юм.