Илчлэг багатай хоол хэрэглэх, түр зуур өлсөх буюу мацаг барих нь хүмүүсийн эрүүл мэнд, дархлаанд яаж нөлөөлж байгаа талаар Америкийн эрдэмтэд судалжээ. Туршилтад сайн дураараа 46 хүн оролцов. Тэд 20-40 насны эр ба эм хүмүүс, жингийн илүүдэлтэй гэхдээ хэт тарган биш. Оролцогчдыг 2 бүлэг болгон хувааж 6 сарын турш илчлэг багатай хоол өгчээ. Эхний бүлэгт багтсан хүмүүсийн хэрэглэх илчлэгийг 10% бууруулсан бол харин 2 дахь бүлгийн илчлэгийг 30% багасгав. Сайн дурынхан зөвхөн туршилтыг зохион байгуулагчдын өгсөн хоолыг идэж байлаа. Мэдээж, туршилтын өмнө тэдний дархлааны системийг эмч нар маш сайн судалжээ. Тухайлбал, арьсны хэт мэдрэмтгий байдал, Т-лимфоцитийн ажиллагаа, бусад хүчин зүйл... Эрдэмтэд хагас жилийн дараа туршилтын дүнг гаргалаа, 2 бүлгийн хүмүүсийн дархлааны систем мэдэгдэхүйц сайжирсан байлаа. “Т-эсүүд болон өлсөлтийн хооронд уялдаа холбоо байгааг бид анх удаа туршилтаар баталж чадлаа” хэмээн АНУ-ын судлаачид мэдэгдлээ.