Бразил улсын Сан-Паулу хотод “COVID 19”-н омикрон штаммын шинэ хувилбар илэрсэн тухай “Folha de S.Paulo” сонин мэдээллээ. Энэхүү шинэ суб хувилбар нь өөртөө ВА.1 ба ВА.2 хувилбарыг хослуулсан гэж тус сонины нийтлэлд дурджээ. Харин зарим эрдэмтэн үүнтэй санал нийлэхгүй байна. “Омикроны шинэ хувилбар илэрсэн гэж ярих арай эрт байна. Үүний тулд дор хаяж 5 хүнээс түүнийг илрүүлсэн байх ёстой. Гэтэл одоогоор шинэ суб хувилбар гээд байгаа нь 3 настай хүүхдээс л олдсон” гэж эрдэмтэд тайлбарлав. 
Цар тахал дэгдсэнээс хойш Бразил улсад нийт 30,4 сая коронавирүсийн халдвар бүртгэгдсэн ба нас барсан хүний тоо 663 мянга гаруй болжээ. Энэ орны хүн амын 74% нь вакцины бүрэн тунд хамрагдсан юм. Бразилд одоо давамгайлж байгаа хувилбар нь стелс-омикрон гэж тус орны хэвлэл мэдээллийн хэрэгсэл дамжууллаа.